Page 5 - Fasnachts-Zeitung 2022
P. 5
5
Spass im Nass
Dr Fritz säit sich am Moorge frieh:P
Bim Uffstoo han iich immer Mieh.
S’zwickt mi doo und s’zwickt mi dääne
wenn mi bugg, chömme miir Drääne.
S’wird glaub Zyt, mi mee z’beweege
und mi nümm fuul uffs Sofa z’leege.
Dr Doggter luegt iin ganz sträng aa
und säit denn zuenem: Guete Maa,
damit Sii wiider schnuufe chönne
und wiider wien e Ree dien renne,
bruuchts Zyt und Yysatz und e Diät,
in guetem Määs und Qualität!
Wo in Aesch chaan iich das finde?
froogt der Fritz und duet sich winde.
Käi Probleem, säit dr Gstudierti
Sii syy hütte scho dr Vierti
won iich ab ins Training schigg,
d’Pandemie, die macht eus digg!
Doo in Aesch do findsch en Oort,
e Blatz für Spiil und au für Sport,
wo d chasch in der Sunne schmoore
und daas alles scho syt Joore.
Syt 50 Joor scho, mergg diirs gly
daucht me dr Ranzen ins Bassin yy.
Also gwagglet unsre Fritz
jeede Moorge wie dr Blitz
in dr Jubiläumspool,
taucht und schwimmt so gar nit fuul.
So wird är sy Fettwanscht los,
d Baadi z Aesch isch halt famoos!
Katharina Noochwuggs
Hesch immer e guete Spruch uff Laager,
bisch witzig, - aber nid makaaber.
Hesch in Aesch di Heimet gfunde
und schnurrsch esoo wie miir doo unde.
Ghöörsch vo Doorffklatsch, bsundre Gschichte?
Hesch au Fröid, wenn si chaasch brichte?
(Drbyy chaasch du jo uff daas Dichte,
wenn s luschtig isch, au voll verzichte).
Jä denn ischs äifach, woog dä Schritt,
und mach bi dääre Zyttig mit!
Miir mäines ärnscht, verzelle käi Chääs,
mäld di doch bi dr Daniela Räss.
Redaktion